Watson Lake

Im Rückspiegel taucht plötzlich en Töff uf.... Töff-fründlich wie mir sind, händ mir ihm Platz gmacht zum Überhole. :-)
Wo er a eus verbigflitzt isch, händ mir ned schlecht gstunet wo mir es Schwizer Kontrollschild vo AI gseh händ.
Denn isch Verfolgigsjagd losgange... mir händ de Bruce drückt was er hed möge. Mit 120 ufem Tacho isch de Töff vor eus glich immer no chliner wurde.
Zum Glück isch er denn am Endi vo Watson Lake abboge, suscht hätted mir ihn ganz verlore.
De Marcel isch erscht grad zum grosse Abentür "Panamericana" ufbroche.
Mir händ eus denn nacheme churze Schwatz verabschiedet und sind go de "Sign Post Forest" aluege.
Hmmmm fehlt echt im Muotathal es Schild??? ;-)
Bim uselaufe isch eus de Marcel entgege cho. Mir händ denn no zäme Znacht gesse im einzige Restaurant vo de "Stadt". Es isch en intressante Obig gsi.
Marcel mir wünsched Dir uf Dinere Reis alles Gueti, unfallfreii Fahrt und viel Sunneschin. Hed eus sehr gfreut Dich kenne z'lerne. Mir werded Dini Reis uf Dinere Homepage verfolge.

Hyder

Vom Cassiar Highway händ mir en "chline" Abstecher gmacht uf Stewart / Hyder.
Stewart isch ned so de Risser gsi, drum sind mir eifach witer gfahre uf Hyder. Das isch Alaska und nur über kanadischi Strosse z'erreiche.
A de "Grenze" id USA hed sich niemert für euse Pass intressiert. Komisch... es isch jo au am Arsch vo de Welt und ersch no en Sackgass uf Schotterpiste.
Dass es verlotteret isch, händ mir erwartet, aber dases so abgf.... isch, hed eus doch chli überrascht. ;-) Liebi Bewohner vo Hyder, mir sind sicher wenn Sunne gschune hätti, wärs sicher au bi euch viel schöner gsi.
Usem "wilde" Alaska wieder zrug a de "Grenze" zu Kanada, händ mir tatsächlich de Pass müesse zücke und jensti Froge beantworte, obwohl eus Zöllnerin vor 15 min. gseh hed dure fahre. ;-)

Cassiar Highway

S'Wetter hed ned so mitgspielt wie mir eus das gwünscht händ. Berge sind meistens hinder de Regewolke versteckt blibe. Trotzdem isches sicher eini vo de schönschte Streckene. Mir händ bis jetzt fang 11 Bäre gseh, und eine devo isch so höch i de dünne Äschtli vomene Baum obe ghockt, dass mer hätti chöne meine er purzlet jede Moment abe.

Bestä Dank für d'Glückwünsch

Ich danke eu ganz herzlich für all eui Glückwünsch zum Geburtstag, han mich riesig gfreut drüber. S'besti am Tag isch s'Früehstück bim Tim Hortons gsi. Suscht häts leider dä ganz Tag pisst :-(